ချစ်သူ့အပြုံးအလှဆုံး
ချစ်သူမျက်နှာ ၊ လပမာသို့
စိတ်မှာစွဲထင် ၊ ပျော်မြူးရွှင်၏။
ချစ်သူအပြုံး ၊ ကြယ်တစ်လုံးသို့
သီကုံးပန်းသွင် ၊ ချမ်းမြေ့ရွှင်၏။
ချစ်သူ့ရယ်ဟန် ၊ ဆည်းလည်းသံသို့
သံစဉ်ချိုမြ ၊ နားဝင်လှ၏။
ချစ်သူဘဝင် ၊ ပြုံးပျော်ရွှင်သော်
ကိုယ်လျှင်ကြည်နူး ၊ အသွင်ကူး၏။
အပြုံးကွယ်ပျောက် ၊ သူစိတ်ကောက်သော်
စိတ်နောက်ကိုယ်နွမ်း ၊ မရွှင်လန်းခဲ့။
လောကကမ္ဘာ ၊ လှရာရာတွင်
မာယာကင်းရှင်း ၊ ပြုံးပျော်ခြင်းနှင့်
ရင်တွင်းရွှင်ပျော် ၊ စိတ်ထားတော်သည့်
ကြင်ဖော်အပြုံး ၊ အလှဆုံးဖြစ်။
အလှဆုံးအပြုံး ၊ သက်ထက်ဆုံးတိုင်
အမုန်းဝေးကွာ ၊ လှမျက်နှာဖြင့်
နေလာအခိုက် ၊ ကြင်နာလိုက်ကြ
ထွေးပိုက်ပျော်ရွှင် ၊ ထာဝစဉ် ။ ။
No comments:
Post a Comment