Tuesday, September 25, 2018

အဖိုးမဖြတ်နိုင်သော ဆေးဖက်ဝင် ဗာဒံပင်


အဖိုးမဖြတ်နိုင်သော ဆေးဖက်ဝင် ဗာဒံပင်

ဗာဒံပင် ကို ဗန်ဒါပင် ဆိုပြီး အလွယ်ခေါ် နေကြတာများသည်။ ဗာဒံပင်၏ အင်္ဂလိပ် အမည်မှာ Indian Almond ဖြစ်သည်။ ရုက္ခဗေဒ အမည်မှာ Terminaliacatappal ဖြစ်သည်။ ဗာဒံပင်သည် အပင်လတ် အမျိုးအစား ဖြစ်သည်။ 

အရွက်များသည် ထွက်ခါစတွင် အညိုရောင်ရှိပြီး ရင့်သွားသောအခါ အနီရောင် ဖျော့ဖျော့ ပြောင်းသွား၏။ ရာသီအလိုက် အရွက်သည် ကြွေ၏။ မကြွေခင် အရောင်မျိုးစုံ ပြောင်းသည်။ အပွင့်များမှာလည်း ဆွဲဆောင်မှု ရှိလှ၏။ 

ဗာဒံသီးကို နှစ်ပိုင်းပိုင်းခြား နိုင်၏။ ကတီ်္တပါ ကဲ့သို့ နူးညံ့သော အပိုင်းနှင့် ကျောက်ကဲ့သို့ မာကျောသော အပိုင်းတို့ဖြစ်၏။ မာကျောသည့် အပိုင်းကို ခွဲလိုက်သောအခါ အစေ့အတွင်းစာ ကို တွေ့နိုင်သည်။


ဗာဒံသီးအတွင်းရှိ ဗာဒံစေ့တွင် အသားဓာတ်၂၀ ရာခိုင်နှုန်း ပါဝင်သည်။ ထိုပါဝင်မှုသည် အပင်များတွင် တွေ့ရခဲလှသည်။ ကျွန်မတို့ စားသုံးနေသော သစ်သီးများတွင် ဗာဒံသီး သည် အာဟာရ ကြွယ်ဝမှု အများဆုံးအသီးလည်း ဖြစ်သည်။ ခန္ဓာကိုယ် ကျန်းမာရေးနှင့် ခွန်အားများ တည်ဆောက်မှု အတွက် ပြည့်စုံမှုကို ပေးနိုင်သော အသီးလည်း ဖြစ်သည်။ ခရီးသွားသူ တစ်ယောက်တွင် အိတ်ထဲ၌ ဗာဒံသီးအပြည့် ထည့်ထားပါက အာဟာရ ပြတ်လပ်ခြင်း မဖြစ်နိုင်ဆိုသော စကားလည်း ရှိ၏။ ဗာဒံစေ့သည် ဆိမ့်သော အရသာရှိသည်။

အရှင်နာဂသိန် အခြေပြု ဆေးအဘိဓာန် ထဲတွင် ဗာဒံသီးသည် ဆီး၊ ၀မ်းကိုရွှင်စေတတ်၏။ သည်းခြေကို ဖြစ်စေတတ်၏။ သလိပ်၊ လေ၊ သည်းခြေ ဖောက်ပြန်ခြင်းနှင့် လေကို ပယ်ဖျောက်တတ်၏။ အသီးမှည့်သည် ပြေပြစ်၏။ သုက်ပွားစေ၏။ ၀ဖြိုးစေ၏။ သလိပ်ကို ဖြစ်စေ၏။ အသီးခြောက်သည် ဓာတ်တို့ ကိုပွားစေ၏။ သုက်ပွားစေ၏။ သလိပ်ကိုပြု တတ်၏။ လေ၊ သည်းခြေကို ကင်းစေ၏။ အသီးစိမ်းသည် ဒေါသသုံးပါးကို နိုင်၏။ အသီးမှည့်သည် သည်းခြေနှင့် လေကိုနိုင်၏။ ရင်ဘတ်နာ၊ အသည်းရောဂါ၊ ချောင်းဆိုးရောဂါ၊ အူရောဂါ၊ သွားရောဂါ တို့ကိုနိုင်၏။ အဆီသည် တွေဝေခြင်း၊ အသည်းရောဂါနှင့် ချောင်းဆိုးရောဂါ တို့ကို ပျောက်ကင်းစေ၏ ဟု ဆိုထားသည်ကို တွေ့ရသည်။

ဗာဒံသီးတွင် ကြေးနီ ပမာ ဟေမိုဂလိုဘင် ထုတ်လုပ်နိုင်ရန် အစာခြေလမ်းကြောင်းမှ သံဓာတ်ကိုစုပ်ယူရန် အဓိက လုပ်ဆောင်ပေးသော သတ္တုဓာတ် ပါရှိကြောင်း အံသြဖွယ် သိရှိရသည်။ ဆေးဖက်ဆိုင်ရာ အကျိုးပြုချက် များမှာ ကြေးနီ၊ ကယ်လ်ဆီယမ်၊ ဖော့စဖော့ရပ်၊ ဗီတာမင်ဘီဝမ်း၊ စီ၊ အီး တို့နှင့် အထူး သက်ဆိုင်သည်ကို တွေ့ရ၏။ ရှေးဆရာကြီး များကပင် အရွယ်သုံးပါး စလုံးတွင် ဗာဒံသီး စားပေးခြင်းသည် သန်စွမ်းကာ အသက်ရှည် နိုင်သည်ဟု ယုံကြည်ထား ကြသည်။

ဗာဒံစေ့၏ အဆန်သည် အပူချိန်ကို ထိန်း၏။ လိင်စိတ်ကိုလည်း ကြွစေ၏။ ၀မ်းကိုပျော့ စေ၏။ ဆီးကိုရွှင်စေ၏။ အားကိုဖြစ်စေ၏။ အာရုံကြောများကို ကောင်းစေသည်ဟု အာယုဗေဒ ဆေးကျမ်းများတွင် ဖော်ပြထားသည် ကိုတွေ့ရပါ၏။ ဗာဒံစေ့ဆီသည် အေးသည်။ ချိုသည်။ ကြွက်သားများကို ပျော့ပျောင်းစေသည်။ အညောင်းအညာ ကို ပြေစေသည်။ ၀မ်းကိုပျော့စေ၏။ ရုပ်ကိုနုပျိုစေ၏။ ထို့ပြင် ဗာဒံစေ့ကို ဦးဏှောက် အားတိုးဆေး အဖြစ် အသုံးပြုကြသည်။ ဗာဒံစေ့သည် ကိုယ်ကို အေးမြစေ၏။

ဗာဒံရွက် သည်လည်း ဓာတုဒြပ်ပေါင်း များစွာပါဝင်သည့် အတွက် ဆေးဖက်ဝင်ပါ၏။ ထိုင်ဝမ်တွင် အရွက်ကြွေ များကို အသည်းရောဂါများ ကုသရာတွင် အသုံးပြုကြသည်။ လက်ဖက်ခြောက် အဖြစ်လည်း အသုံးပြုကြသည်။ သုတေသန ပြုလုပ်ချက်များ အရ အရွက်များထဲတွင်လည်း ကင်ဆာကို ပျောက်ကင်းစေသော ဒြပ်ပေါင်းများ ပါရှိသည်ကို သိရသည်။ အရွက်ခြောက် များတွင် စံပမာဏ မြင့်မားသည်များကို လျော့ကျစေသော တန်ခိုးထူးလည်း ရှိပါ၏။

အီရန်နိုင်ငံတွင် ပါတီပွဲ အတော်များများ တွင် ပင်လယ်ဆားဖြင့် အငန်ဖောက်ထားသော ဗာဒံစေ့လှော် နှင့်ဧည့်ခံလေ့ရှိ၏။ မော်ရိုကိုနိုင်ငံ ၏ အရေးကြီးသော အခမ်းအနားများ တွင်လည်း ဗာဒံစေ့မှုန့်နှင့် ရောစပ်ထားသော နွားနို့က မပါလျှင်မပြီးပါ။ အိန်္ဒိယနိုင်ငံတွင် ဗာဒံစေ့ကို ဟင်းခတ်အမယ် အဖြစ် ထည့်ချက်ကြသည်။ ဗာဒံစေ့၏ အေးမြသော သတိ်္တကြောင့် ပူပြင်း ခြောက်သွေ့သော ပါကစ္စတန်နိုင်ငံ၏ နွေရာသီများတွင် ဗာဒံစေ့ နှင့်ဖော်စပ်ထားသော ဖျော်ရည်ကို သောက်သုံးကြတာ တွေ့ရသည်။

ကမ္ဘာ့ အသိအမှတ်ပြု USDA ၏ ဓာတ်ခွဲ စမ်းသပ်ချက်အရ ၁၀၀ ဂရမ်ရှိသော ဗာဒံစေ့ အတွင်းတွင် လူသားတို့ ကျန်းမာရေးကို ကောင်းကျိုးပြု စေသည့် ခွန်အား ၅၇၆ ကယ်လိုရီ၊ ကစီဓာတ် ၂၁ ဒသမ ၆၉ ဂရမ်၊ ကော်ဓာတ် သုည ဒသမ ၇၄ ဂရမ်၊ သကြား ၃ ဒသမ ၈၉ ဂရမ်၊ ချေဖျက်လွယ်သော အမျှင်ဓာတ် ၁၂ ဒသမ ၂၂ ဂရမ်၊ အဆီဓာတ် ၄၉ ဒသမ ၄၂ ဂရမ်၊ ပရိုတင်း ၂၁ ဒသမ ၂၂ ဂရမ်၊ လိုင်စင်း သုည ဒသမ ၅၈ ဂရမ်၊ ရေဓာတ် ၄ ဒသမ ၇ ဂရမ် စသည်ဖြင့် အခြား အကျိုးဖြစ်စေသော ဓာတ်များလည်း ပါဝင်သည်ကို တွေ့ရသည်။

ဗာဒံစေ့သည် အသားအရေကို ပြန်လည် နုပျိုစေကာ မှတ်ဉဏ် စွမ်းအားများ ကောင်းစေသည်ကို တွေ့ရသည်။ အူသိမ်၊ အူမများနှင့်အူ၏ အတွင်းပိုင်း အကျဆုံး နေရာများကိုလည်း ပြန်လည် သန့်စင်ပေးသည်။ ဗာဒံစေ့သည် အပျိုဖော်ဝင် မိန်းကလေး များနှင့်လည်း အထူးသင့်လျော်ပါ၏။ ဗီတာမင်အီး အပြည့်အ၀ ပါဝင်သောကြောင့် ၀က်ခြံပေါက်တတ်သူ များသာမက အရေပြားရောဂါ ရှိသူများနှင့်လည်း သင့်လျော်သည်။

ဗာဒံစေ့သည် အထွေထွေ အားနည်းခြင်း နှင့် နာလန်ထစ လူနာများအတွက် အထူး ကောင်းမွန်သည့် ဖြည့်စွက်စာ တစ်မျိုးဖြစ်သည်။ ဆံပင်ကျွတ်များသူ အနေဖြင့် ဗာဒံဆီကို လိမ်းပေးနိုင်သည်။ သန်းထူသူများ အနေဖြင့်လည်း လိမ်းပေးနိုင်သည်။ ဗာဒံစေ့ကို ကြိတ်ကာ ပျားရည်နှင့် လိမ်းပေးခြင်းဖြင့် မျက်နှာရှိ အညစ်အကြေးများကို ကင်းစင်စေသည်။ ဗာဒံစေ့သည် ကာဘိုဟိုက်ဒရိတ် အနည်းငယ်သာ ပါဝင်သဖြင့် ဆီးချိုလူနာများ နှင့်လည်း အထူး သင့်လျော်သည်။

နေလောင်ဒဏ် ခံရ၍ဖြစ်သော အကွက်များ တွင်လည်း ဗာဒံစေ့ကိုကြိတ်ကာ အုန်းဆီဖြင့် လိမ်းပေးနိုင်သည်။ ဗာဒံစေ့သည် သွေးထဲရှိ ကိုလက်စထရော ကို ကျစေသောကြောင့် ၀သောသူများနှင့် အထူး သင့်လျော်သည်။ ဗာဒံစေ့သည် နှလုံးရောဂါ ဖြစ်ပွားနှုန်းကို လည်းလျှော့ချ ပေးသည်။ အယ်လ်ဇိုင်းမား ဝေဒနာသည်များ အနေဖြင့် ဖြည့်စွက်စာ အဖြစ် ဗာဒံစေ့ကို စားသုံးပေး နိုင်သည်။ ၀မ်းကိုက်ခြင်း များတွင်လည်း ဗာဒံပင်၏ အခေါက်ကို သုံးခွက်တစ်ခွက် ကျို၍ သောက်ပေးခြင်းဖြင့် သက်သာစေသည်။ သို့သော် ဖန်သောအရသာရှိပြီး ချုပ်စေသော သတိ်္တရှိခြင်းကြောင့် အလွန်အမင်းတော့ မသောက်သုံးသင့်ပါ။ ဗာဒံစေ့ တစ်အောင်စကို စားသုံးပေးပါက မျက်စိကျန်းမာရေး အတွက်တစ်နေ့တာ လိုအပ်သော ဗီတာမင်အီး ၏ ၅၀ ရာခိုင်နှုန်းကို လည်း ရရှိမည်ဖြစ်သည်။

ထို့အတူ လူကိုခွန်အား ဖြစ်စေသော အစေ့အဆန် များတွင်လည်း ဗာဒံစေ့သည် တန်ဖိုးရှိသော အရာတစ်ခု ဖြစ်သည်။ ငယ်စဉ်အချိန်က လူကြီးသူမ များသည် ရေစိမ်ထားသော ဗာဒံစေ့များကို မကြာခဏစားခိုင်း လေ့ရှိကြပါ၏။ ရေစိမ်ထားသော ဗာဒံစေ့များသည် အစာခြေရတာ ပိုလွယ်ကူပြီး အစာခြေစနစ်ကို အားကောင်းစေသော အာဟာရ တန်ဖိုးများစွာ ပါဝင်သောကြောင့် ဖြစ်သည်။

အမေရိကန်နိုင်ငံ၏ သုတေသီများက အူမကြီးကင်ဆာ ရောဂါကို ခံစားနေရသည့် လူနာ ၈၂၆ ဦးကို ခွဲစိတ်ကုသခြင်းနှင့် ဓာတုကုထုံးဖြင့် ကုသခြင်းကို ခံယူပြီး ခြောက်နှစ်ခွဲအတွင်း စမ်းသပ်မှုတစ်ခုကို ပြုလုပ်ခဲ့ကြသည်။ အပတ်စဉ် ၂၈ ဂရမ်ရှိသော ဗာဒံစေ့ ကို နှစ်ကြိမ်စားပေးသော သူများသည် အခြား မစားသုံးသော လူနာများထက် ရောဂါ ပျောက်ကင်းမှု ၄၆ ရာခိုင်နှုန်း ပိုမိုများပြား ကြောင်း သိရှိခဲ့ရသည်။ သို့ပါသောကြောင့် ဗာဒံစေ့ ကဲ့သို့သော အခွံမာသီး များသည် ခန္ဓာကိုယ်အတွင်း အင်ဆူလင် ခုခံမှုကို လျော့ကျစေပြီး နာတာရှည် ဆီးချိုအမျိုးအစား ရောဂါလူနာများ အတွက် စားသုံးရန်သင့် လျော်ကြောင်း အကြံပြုထား ကြသည်။

ဗာဒံစေ့သည် ကင်ဆာကိုလည်း ကာကွယ်ပေး နိုင်စွမ်းရှိသည်။ ဦးနှောက် ကျန်းမာရေး ကိုလည်း ကောင်းမွန်စေသည်။ အရိုးများကိုလည်း သန်မာစေသော အစွမ်းရှိသည်။ ၀မ်းချုပ်ခြင်း အတွက် ကောင်းမွန်သော ဓာတ်စာလည်း ဖြစ်သည်။ ဖွံ့ဖြိုးစကလေးများ အတွက် အရိုးများ သန်မာစေရန် ပုံမှန်ကျွေး သင့်သည်။ သတိပြုရန်မှာ နွေရာသီနှင့် ပူအိုက်သော အချိန်များတွင် ဗာဒံစေ့ကို စားသုံးမည် ဆိုပါက အပေါ်ယံအခွံပါးကို ဖယ်ရှားပစ် ရမည်ဖြစ်သည်။ သို့မဟုတ်ပါက ခန္ဓာကိုယ်၏ အပူချိန်ကို ပိုမိုမြင့်မား လာစေသောကြောင့် ဖြစ်သည်။ ဤသို့ဖြင့် ဆေးဖက်လည်းဝင် စားလို့လည်း မြိန်သော ဗာဒံပင်အကြောင်း တင်ပြလိုက်ရ ပါသည်။

မုဒိတာ (တောင်သာ)

No comments: