အမျိုးသားများနှင့် ဆီးကျိတ်ကင်ဆာ

 

အမျိုးသားများနှင့် ဆီးကျိတ်ကင်ဆာ

 

ကမ္ဘာပေါ်တွင် ဆီးကျိတ်ကင်ဆာ ဖြစ်ပွားသော အမျိုးသားများဟာ ပျမ်းမျှအချိန် ၁၈ မိနစ်တိုင်းမှာ တစ်ဦးနှုန်း သေဆုံးနေကြပါတယ်။   “ ယောက်ျား မှာဆီး၊ မိန်းမမှာမီး”ဟူသော ဆိုရိုးစကား အတိုင်း အမျိုးသားများကို ဒုက်္ခပေးလေ့ရှိသော ဆီးကျိတ်ကို ဆေးပညာအရ  သုက်ရည်ဂလင်းဟု ဆိုကြပါတယ်။ သက်လတ်ပိုင်း အရွယ်သို့ ရောက်ရှိလာသော အမျိုးသား တစ်ယောက်တွင် သုက်ရည်ဂလင်း ပြဿနာ ဖြစ်လာနိုင်ခြေ  အလွန်များပြား လာတဲ့အတွက် ဆရာဝန်နှင့်မှန်မှန် ဆေးစစ်ဖို့ လိုအပ်ပါတယ်။ ဒါကြောင့်လည်း  ကမကျန်းမာရေးအဖွဲ့အစည်းများက အမျိုးသား များတွင်ဖြစ်ပွား တတ်သော    ဆီးကျိတ်ရောဂါ အကြောင်းကို သတိပေး လိုသော ရည်ရွယ်ချက်ဖြင့် စက်တင်ဘာလ ကို ကမ္ဘာ့ Prostate Cancer Awareness Month   ဆီးကျိတ်ကင်ဆာ သတိထားရမယ့် လတစ်လအဖြစ် အထူးတလည် သတ်မှတ် ဆော်သြ ပေးထားခြင်း ဖြစ်ပါတယ်။

 

ဆီးကျိတ်၏အရေးပါပုံ

 

ဆီးကျိတ်ဆိုတာ မျိုးပွားစေသည့် အကျိတ်ဖြစ်ပြီး သစ်ကြားသီး အရွယ်ခန့် ရှိပါတယ်။ ထိုအကျိတ်ဟာ ဆီးအိမ်၏ အောက်ခြေတွင် တည်ရှိကာ လိင်ကျန်းမာ ရေးနှင့် ဖိုမ မျိုးပွားခြင်း အတွက် အရေးပါသည့် အကျိတ်ဖြစ်ပါတယ်။   

 

ဆီးကျိတ်ကင်ဆာ နှင့်အခြား ရောဂါများ

 

ဆီးကျိတ်တွင်ပြဿနာ ရှိပြီး ရုတ်တရက် ကြီးထွား လာပါက ဆီးလမ်းကြောင်း ကိုဖိထား သောကြောင့် ဆီးများမထိန်း နိုင်ခြင်း၊  ဆီးသွားစဉ် နာကျင်ခြင်း၊ ညှစ်၍ဆီးသွား ရသည့်အတွက် သက်သောင့်သက်သာမရှိခြင်းနှင့် ဆီးထဲတွင် သွေးပါခြင်း စသည့်ဝေဒနာ များကို ခံစားကြရပါတယ်။

 

 အခြေအနေ ဆိုးရွားပါက သုက်ရည်ဂလင်း ထဲတွင် ကင်ဆာအဖု အကျိတ်ဖြစ်ပေါ် လာတတ် ပါတယ်။ ထိုအခြေအနေ မျိုးမှာ ဆေးဝါးကုသမှု ကောင်းစွာမခံယူ ခဲ့ပါက ခန္ဓာကိုယ်၏ အခြားနေရာများ ထိပါ ကင်ဆာဆဲလ်များ ပျံ့နှံ့တတ်ပါတယ်။ အမျိုးသား များဆီးသွား ရာတွင် ပုံမှန်အနေအထား မဟုတ်တော့ဘဲ ထူးခြားသည့် လက္ခဏာ တစ်စုံတစ်ရာ ဖြစ်လာသော အခါများတွင် လည်းကောင်း၊ ဆီးကျိတ် ရောင်ရမ်းသော အခါတွင်လည်းကောင်း မပေါ့ဆဘဲ ဆရာဝန်နှင့်ပြသင့် ပါတယ်။ ပျမ်းမျှ အသက် ၃၀ နှစ်နှင့် ၅၀ နှစ်အကြားရှိ အမျိုးသားများမှာ မကြာခဏ ဆီးကျိတ် ရောင်ရမ်းခြင်း ဖြစ်ပေါ် တတ်ပါတယ်။   ထိုသို့ ရောင်ရမ်းခြင်းဟာ ဗက်တီးရီးယား ပိုးကြောင့်   ရောင်ရမ်းနိုင်သလို  အခြားပြဿနာ ကြောင့်လည်း  ရောင်ရမ်းနိုင် ပါတယ်။

 

ဆီိးလမ်းကြောင်းမှ   ဗက်တီးရီးယားပိုး ၀င်၍ ဆီးကျိတ် ရောင်ရမ်းသော အခါများတွင် အဖျားတက်ခြင်း၊ ချမ်းစိမ့်စိမ့်ဖြစ်ခြင်း၊ ကြွက်သားများ ကိုက်ခဲနာကျင်ခြင်း၊ လိင်အင်္ဂါ နာကျင်ခြင်းနှင့် ဆီးသွားရာ၌ ပုံမှန်မဖြစ်ခြင်း စသည့်ရောဂါ လက္ခဏာများ  ခံစားရတတ် ပါတယ်။ ဗက်တီးရီးယား ပိုးကြောင့်မဟုတ်ဘဲ ဆီးကျိတ်ရောင်ရမ်း သောအခါများ တွင်လည်း  အလားတူ ဖော်ပြပါ  ရောဂါဝေဒနာ များအတိုင်း   ခံစားကြရ ပါတယ်။  သို့သော် ရောဂါ ကူးစက်ခြင်း ဇာစ်မြစ်ကို အဖြေရှာရန် ခက်ခဲ ပါလိမ့်မယ်။

 

ဆီးကျိတ်အရွယ်အစား စတင်ကြီးထွားရောင်ရမ်းလာခြင်း

 

အသက် ၄၀ ကျော် အမျိုးသားများတွင် ဝှေးစေ့မှ ထွက်သော ဟော်မုန်းဓာတ် လျော့နည်းသွား သောကြောင့် သုက်ရည်ဂလင်း  စတင်ပြီး ရောင်ရမ်းကြီးထွား လာတတ် ကြပါတယ်။ ထိုအခြေအနေ မျိုးမှာ ဆီးပြတ်တောင်း ပြတ်တောင်း သွားခြင်း၊ ဆီးသွားရာ၌ အားမရခြင်းနှင့် ဆီးအိမ်ထဲမှာ ဆီးများကျန် နေသေးသည်ဟု ခံစားရခြင်း  စသည်တို့ ကဲ့သို့သော ပိတ်ဆို့သည့် လက်္ခဏာများ ဖြစ်လာ  တတ်ပါတယ်။ ထို့ပြင် တချို့ အမျိုးသား များတွင် ၎င်း လက္ခဏာများ နှင့်ဆန့်ကျင်ဘက် ဖြစ်သော ဆီးပမာဏ ထွက်ရှိမှု  များပြားလာခြင်း၊ ဆီးသွားလိုစိတ် ပြင်းပြခြင်းနှင့် ဆီးသွားနေစဉ်  ဆီးအိမ် နာကျင်ခြင်း စသည့် လက္ခဏာ တို့လည်း ဖြစ်တတ် ပါတယ်။

 

ဆီးကျိတ်ကြီးထွား ရောင်ရမ်းခြင်း ဝေဒနာသည် အသက်ကို ခြိမ်းခြောက် အန္တရာယ်ပြု သည်ဟု မဆိုလို သော်လည်း အမျိုးသားများ၏ ဘ၀သက်တမ်း ကိုတော့ ထိခိုက်စေသည်မှာ ဧကန်မလွဲပါဘဲ။ အကျိတ်ကြီးထွား လာသောအခါ၌ ကျောက်ကပ်တွင် ကျောက်တည်ခြင်း နှင့် ဆီးမထိန်းနိုင်ခြင်း စသည့်ပြဿနာများ ဖြစ်လာပါပြီ။ အဆိုပါ အခြေအနေ မျိုးတွင် ဆရာဝန်နှင့် ဆွေးနွေး တိုင်ပင်ကာ ထိရောက်စွာ ဆေးဝါးကုသမှု ခံယူသင့်ပြီး  ဝေဒနာရှင် ကလည်း ညနေစောင်းပိုင်း မှစ၍ ရေကို  အနည်းငယ် လျှော့၍သောက်ခြင်း၊  အရက်သေစာ သောက်စားခြင်းမှ ရှောင်ရှားခြင်း၊  ကဖိန်းဓာတ် ပါသော အရည်များကို လုံးဝ မသောက်ခြင်း၊  ဆီးရွှင် ဆေးကဲ့သို့သော ဆီးဆေးများကို မမှီဝဲခြင်း စသည်ဖြင့် မိမိကိုယ်ကို ဆင်ခြင်ဖို့ လိုအပ်ပါတယ်။

 

ဆီးကျိတ်ကင်ဆာ 

 

မိသားစုရာဇ၀င်ကို ဆန်းစစ်ကြည့် ရာ၌   ဖခင် သို့မဟုတ် ညီအစ်ကို များတွင် ဆီးကျိတ်ကင်ဆာ ရှိကြလျှင် သင်သည်လည်း အသက် ၄၀ နောက်ပိုင်းတွင် ဆီးကျိတ်ကင်ဆာ ဖြစ်နိုင်ခြေ ပိုများပါတယ်။ ဆိုးရွား ပြင်းထန် လာသော အခြေအနေမှာ  ၎င်းကင်ဆာ ဆဲလ်များဟာ ခန္ဓာကိုယ်ထဲရှိ ကုသရန် ခက်ခဲသော နေရာများ ဖြစ်ကြသည့် သွေးဖြူဥများ၊ အရိုးများနှင့် အခြား ကိုယ်အင်္ဂါ အစိတ်အပိုင်းများ ထိပါ ပျံ့နှံ့သွားနိုင် ပါတယ်။

 

ကာကွယ်တားဆီးခြင်း

 

အကယ်၍ သင့်မှာ အထက်ပါရောဂါ လက္ခဏာများ မပြသေး သော်လည်း သင်သည် အသက် ၄၀  ရောက် ချိန်မှစ၍  ဆီးကျိတ် ကျန်းမာရေး အခြေအနေကို ပုံမှန် စစ်ဆေးသင့် ပါတယ်။ အာဟာရ ပြည့်ဝစွာ စားသောက် ခြင်းကလည်း ထိုရောဂါ ဝေဒနာကို  တစ်ဖက် တစ်လမ်းက ဟန့်တားကာကွယ် ပေးသကဲ့သို့  ပြည့်ဝဆီ မြင့်မားစွာ ပါရှိသော အစားအစာ များကို အထူး ရှောင်ကြဉ်ဖို့  လိုပါတယ်။ သွေးထဲမှာ ဟိုက်ဒရိုဂျင် ပါသော အဆီပမာဏ မြင့်မားခြင်းကြောင့် ဆီးကျိတ်ကင်ဆာ ဖြစ်ပေါ်နိုင်၍ သကြားပါသော ဖျော်ရည်များ   သောက်သုံးမှုကို ရှောင်ရှားပါ။ အနီရောင် အသားများ၊ တာရှည်ခံ အသားများ၊ ဆားဖြင့် တာရှည်ခံအောင် ပြုလုပ်သော အစား အစာတွေကိုရှောင်ပါ။ ဆားစားသုံးမှု ပမာဏမြင့်မား ခြင်းက ဆီးကျိတ်ကင်ဆာ အန္တရာယ်ကို မြင့်တက်စေ၍  ဆား အငန် လျှော့စားပါ။ ပန်းဂေါ်ဖီစိမ်း၊ ခရမ်းချဉ်သီး၊ ကျောက်ဖရုံသီး၊ မန်ကျည်းသီးမှည့်၊ ကညွတ်၊ သဘာဝ ဆန်၊ ဂျုံ၊ ပဲ၊  ပြောင်းစားပါ။ ဟင်းလျာများကို သံလွင်ဆီ၊ မြေပဲဆီတို့ကဲ့သို့  မပြည့်ဝဆီဖြင့်သာ ချက်ပြုတ် စားသောက်ပါ။ ပင်လယ်ငါးကြီး များတွင်  Omega-3 fatty acids များ ကြွယ်ဝစွာ ပါရှိသောကြောင့်  ကင်ဆာရောဂါ ကိုတိုက်ထုတ် ပေးနိုင်ပါတယ်။ ကြက်သွန်ဖြူ၊ ကြက်သွန်နီ၊  ကြက်သွန်မြိတ် နှင့် ပဲပုပ်တို့မှာ ပါရှိတဲ့ Allyn Sulfa ဓာတ်က ကင်ဆာရောဂါ တိုက်ထုတ် ပေးနိုင်သော အစွမ်းသတ်္တိ များစွာ ရှိနေပါတယ်။ ဆီးကျိတ်ကြီးထွား ရောင်ရမ်းသော အခါများမှာ ကန်စွန်းရွက်ကို ထောင်း၍ ရောင်ရမ်းသော နေရာတွင် အုံပေးခြင်းဖြင့် သက်သာ ပျောက်ကင်း စေနိုင်ပါတယ်။ အထူးသဖြင့် နနွင်းမှုန့်ကို ပန်းဂေါ်ဖီ (အဖြူ)နှင့် တွဲဖက်၍ ချက်စားခြင်းက  ဆီးကျိတ်ကင်ဆာ ဖြစ်ခြင်းမှ ကာကွယ်ပေး နိုင်ပါတယ်။ အကင်စာတွေ အစားများ သူတို့မှာ ကျောက်ကပ် သာမက အူမကြီး၊ ပန်ကရိယနှင့် ဆီးကျိတ် ကင်ဆာများပါ ပိုအဖြစ်များ ကြကြောင်း ကင်ဆာ အသင်းကြီးက ဆိုပါတယ်။ ၀ိုင်နီကို ရက်သတ္တပတ် လျှင် လေးခွက်မျှ  ပုံမှန်သောက်သုံး ပေးခြင်းဖြင့်  သုက်ရည်ဂလင်း ကင်ဆာဖြစ်နိုင်ခြေ အလားအလာကို    ၅၀ ရာခိုင်နှုန်းထိ လျှော့ချပေး နိုင်ပါတယ်။ မှိုထဲတွင်ပါ ရှိသော Selenium ဓာတ်တစ်မျိုးက အမျိုးသားများ  ရာဂစိတ် တက်ကြွလာစေရန်  နှိုးဆော်ပေး နိုင်စွမ်းရှိ သည့်ပြင် အမျိုးသားများ၏ ဆီးကျိတ်ကင်ဆာဖြစ်ပေါ်လာမှုကို ၆၅ ရာခိုင်နှုန်း  ကာကွယ်ပေး နိုင်ပါတယ်။

ဆီးကျိတ်ကင်ဆာရောဂါ ရှိ၊ မရှိကိုစစ်ဆေးခြင်း

(၁) ဆရာဝန်က  လူနာ၏စအိုလမ်းကြောင်းထဲမှ လက်ဖြင့်နှိုက်၍ ဆီးကျိတ် အရွယ်အစား ပြောင်းလဲမှု စစ်ဆေးခြင်းကို ဆေးပညာအရ  Digital Rectal Exam (DRE)  ဟုခေါ်ပါတယ်။

(၂) Prostate-speckfic antigen (PSA) နည်းဖြင့်လည်း  ထိုကင်ဆာရောဂါ ရှိ၊ မရှိကို စစ်ဆေးနိုင်ပြီး ထိုနည်းက သုက်ရည်ဂလင်းမှထုတ်ပေးသော  သွေးထဲရှိ ပရိုတင်း ပမာဏကို တိုင်းတာ စစ်ဆေးသော နည်းဖြစ်ပါတယ်။ အကယ်၍ ပရိုတင်း ပမာဏ  မြင့်မား နေခြင်းဟာ  သုက်ရည်ဂလင်း ကင်ဆာ ရှိကြောင်းကို  ဖော်ပြနေခြင်း ဖြစ်ပါတယ်။

(၃) Ultrasound ဖြင့် စမ်းသပ်နိုင် ပါတယ်။ စအို လမ်းကြောင်း ထဲတွင် ပြွန်တစ်ခု ထည့်၍ သုက်ရည်ဂလင်း အနားထိ ရောက်အောင် အသံလှိုင်းကို ဖြတ်သန်း  စေကာ  ကွန်ပျူတာ ထဲတွင်ပေါ်လာ သောပုံရိပ်ကို ကြည့်၍ ကင်ဆာရောဂါ ရှိ၊ မရှိကို စစ်ဆေးတွေ့ရှိ နိုင်ပါတယ်။

(၄) အလွန် သေးငယ်သော အပ်ဖြင့် နမူနာ တစ်သျှူးစကို ထုတ်ယူပြီးနောက်  အနုကြည့် မှန်ဘီလူး အောက်မှာ  ဆဲလ်အကျိတ် စစ်ဆေးခြင်း ကိုတော့ Biospy ခေါ် အသားမျှင်ကို ထုတ်၍  ဓာတ်ခွဲ စစ်ဆေးနည်း လို့ခေါ်ပါတယ်။

 

အစားအစာနှင့်ဆီးကျိတ်ကင်ဆာ

 

ဆေးသုတေသီ များ၏ အသစ်တွေ့ရှိချက် များအရ စားသုံးသော အစားအစာ များတွင် ပြည့်ဝဆီ ပါဝင်မှု များပြားခြင်းက အမျိုးသားများ အတွက် ဆီးကျိတ် ကင်ဆာ ပိုမိုဆိုးရွား စေနိုင်ကြောင်း လေ့လာတွေ့ရှိခဲ့ ကြပါတယ်။ အဆီ အများအပြား ပါဝင်သော  အသားများ၊  နို့ခဲ၊ ဒိန်ခဲများကို လွန်ကဲစွာ စားသုံးလေ့ ရှိသော အမျိုးသားများမှာ ပိုမိုဆိုးရွားတဲ့ ဆီးကျိတ် ကင်ဆာ ဖြစ်လာနိုင်ခြေ  ပို၍မြင့်မား ပါတယ်။ ၎င်းပြည့်ဝဆီများ လွန်ကဲခြင်းက နှလုံးနှင့် သွေးကြောဆိုင်ရာ ရောဂါများ ကိုလည်း ဖြစ်ပွား စေနိုင်ပါတယ်။ သို့သော် သွေးထဲတွင် ကိုလက်စထရော များပြားခြင်း အတွက် သွေးတွင်း အဆီကျဆေး များကို သောက်သုံး နေရတဲ့ အမျိုးသား များမှာတော့  ဆီးကျိတ်ကင်ဆာ ပိုမိုဆိုးရွား နိုင်ခြေ နည်းပါးကြောင်း ကိုလည်း   တွေ့ရှိခဲ့ကြပါတယ်။

 

ဒါကြောင့် အမျိုးသားများ အနေဖြင့် ပြည့်ဝဆီပါဝင်မှု များပြားသော အစားအစာ များကို တတ်နိုင်သမျှ ရှောင်ကြဉ်ကြ ရန်နှင့် သွေးထဲတွင် ကိုလက်စထရော ပမာဏများပြား နေပါက ဆရာဝန်နှင့် ပြသပြီး သင့်လျော် သော ကုသမှုခံယူ သင့်ပါတယ်။

 

 Precaution is Better than Cure ဆိုသော ဆိုရိုးစကား ရှိပါတယ်။ ဆိုလိုရင်းမှာ ရောဂါဖြစ်လာမှ ကုသခြင်းထက်  ရောဂါမဖြစ်ခင် ကြိုတင် ကာကွယ်ခြင်း သည်သာ အကောင်းဆုံး ဖြစ်ပါတယ်။ လူ့ ဘ၀သည် ရခဲလှသဖြင့် လူသားအားလုံး  သက်တမ်းစေ့ နေနိုင်ရေး အတွက် မိမိနှင့်တကွ၊ မိမိ၏မိသားစု၊ ဆွေမျိုးသားချင်း၊ ပတ်ဝန်းကျင် အသိုင်းအ၀ိုင်း တို့တွင် အမျိုးသားများ နှင့်  ဆီးကျိတ်ကင်ဆာ ကျန်းမာရေး ဗဟုသုတ ရှိစေလိုပါ ကြောင်း စေတနာ အရင်းခံဖြင့် တိုက်တွန်း လိုက်ရပါ တယ်။  

 

မှတ်ချက်။ အကယ်၍ ကျန်းမာရေး လမ်းညွှန်ကို ဖတ်ရှုနေသော သင်သည် အမျိုးသမီး  တစ်ယောက် ဖြစ်နေပါလျှင် သင်၏ဖခင်၊ ခင်ပွန်း၊ အစ်ကို၊ မောင်၊ သား၊ မြေးတို့အား ဤကျန်းမာရေး လမ်းညွှန် ဗဟုသုတ ကို လက်ဆင့်ကမ်း မျှဝေပေးကြ စေလိုပါသည်။

 

ပေါက်ပေါက်

ဓာတ်ပုံ - အင်တာနက်