ကမ္ဘာ့ရွာ နှင့် သဟဇာတ

ကမ္ဘာ့ရွာ နှင့် သဟဇာတ

ယနေ့အချိန်အခါတွင် နည်းပညာ၏ အစွမ်းက အံ့မခန်းတိုးတက် လာသည်ကို တွေ့နေရသည်။ အထူးသဖြင့် နည်းပညာ၏ ထုတ်ကုန်တစ်ခု ဖြစ်သော ဖေ့စ်ဘွတ်သည် ကျွန်တော်တို့ နိုင်ငံသားတော်တော် များများအပေါ် သိသိသာသာ လွှမ်းမိုးလာခဲ့ပြီ ဖြစ်သည်။

ငွေကျပ် တစ်ထောင့်ငါးရာတန် ဆင်းကတ်တစ်ခု နှင့် ငွေကျပ် လေးသောင်း၊ ငါးသောင်းတန် ဟန်းဆက်တစ်ခု အရင်းအနှီးပြုရုံမျှဖြင့် ကမ္ဘာ့ရွာကြီး အတွင်းသို့ တိုးဝင်ခွင့် ရနေကြပြီ။ ထိုမျှလွယ်ကူလှသဖြင့် မြို့က ဒေးဗစ် နှင့် ရိုစီ တို့ သာမကဘဲ တောက လှမောင် နှင့် အေးစိန် တို့ပါ ဖေ့စ်ဘွတ်သုံးစွဲ လာကြတော့သည်။

ဖေ့စ်ဘွတ် သုံးစွဲခြင်းအားဖြင့် ရန်ကုန်နှင့် မန္တလေး ၊ ကျေးလက်နှင့်မြို့ပြ၊ အရှေ့ကမ္ဘာနှင့် အနောက်ကမ္ဘာ ဝေးကွာသည်ဟူ၍ မရှိတော့။ မည်သည့်နေရာတွင် မည်သို့ ဖြစ်ပျက်နေကြောင်း အချိန်မဆိုင်း သိခွင့်ရနေပြီ ဖြစ်သည်။ ဖေ့စ်ဘွတ်၏ ကောင်းကျိုးများက စာစီပြောမည်ဆိုလျှင် ကုန်အံ့မထင်။

မည်သည့်လောကတွင် မဆို အကောင်း အဆိုး အကျိုးးအပြစ်တို့ ယှဉ်တွဲတတ်သည့် အတိုင်း ကောင်းကျိုး များလှသည်ဆိုသော ဖေ့စ်ဘွတ်သည်လည်း လိုက်မမီနိုင် လောက်အောင် မာယာများ တတ်ကြောင်း တွေ့ရပြန် လေသည်။

ဖေ့စ်ဘွတ်သုံးစွဲသူ များတွင် ကြီးသူ၊ ငယ်သူ၊ ပညာတတ်သူ၊ မတတ်သူ၊ ဆင်ခြင်တုံတရား မြင့်မားသူ ၊ နိမ့်ကျသူ၊ ငွေကြေး ချမ်းသာသူ၊ ဆင်းရဲသူ မျိုးစုံပါဝင်လျက်ရှိသည်။ အချို့က မိမိတို့အကျိုး မြင့်မားတိုးတက်ရေး အတွက် အသုံးပြုကြ သလို အချို့ကတော့ သူတစ်ပါးအကျိုး ယုတ်လျော့ ပျက်စီးရေးအတွက် ဖေ့စ်ဘွတ်ကို ခုတုံးလုပ်သုံးစွဲ လာကြသည်ကိုလည်း တွေ့နေရသည်။ ထိုသို့သော သူများက ကောလာဟလ ကို အဓိကထား အသုံးပြုတတ် လေ့ရှိသည်။

ကောလာဟလဟူသည် အခြေအမြစ် ရှိတတ်သည်မျိုးမဟုတ်။ မည်သည့်သတင်း အရင်းအမြစ်ကိုမျှ ခိုင်ခိုင်မာမာ အခြေပြုထားခြင်း မရှိဘဲ အများယုံကြည် နိုင်လောက်စေမည့် အကြောင်းအရာ (သို့မဟုတ်) အများ သည်းခြေကြိုက် စေမည့် အကြောင်းအရာ တို့ကို အခြေပြုထားလေ့ ရှိတတ်သည်။ ဆင်ခြင်တုံတရားမဲ့သူ တို့မဆိုထားနှင့် အသိဥာဏ်ပညာ ပြည့်ဝသူတို့ကိုပင် တွေဝေတုံ့ဆိုင်း စေသည်ထိ ဆွဲဆောင်မှု ပြုတတ်ကြသည်။ ထိုကဲ့သို့သော အကြောင်းအရာတို့ကို အခြေပြုလျက် လူတစ်ဦး၊ အဖွဲ့အစည်းတစ်ခု နစ်နာစေရေး အတွက် ဖေ့စ်ဘွတ်ပေါ်သို့ ပို့စ်တစ်ခုအဖြစ် ဖန်တီး တင်ပေးလိုက်ကြသည်။ တစ်နည်းအားဖြင့် ဖေ့စ်ဘွတ်ပေါ်သို့ မီးပွားတစ်စအဖြစ် အစပြုပေးလိုက်ခြင်း ဖြစ်သည်။ အစပြု ပေးလိုက်သော မီးပွားတစ်စ၏ အဓိကဦးတည်ချက်မှာ အထူး ပြောစရာမလိုသည့် ဆင်ခြင်တုံတရား နိမ့်ပါးလွန်းသူများသာ ဖြစ်သည်။ ဆင်ခြင်တုံတရား နိမ့်ပါးလွန်းသူများ ကလည်း မှန်သည်၊ မှားသည် သုံးသပ်နိုင်စွမ်း မရှိကြသဖြင့် သူတို့ ခံစားမှုနှင့် တိုက်ဆိုင်မည်ဆိုပါက ပြောစရာရှိလျှင် မဆင်မခြင်ပြောသည်။ ရေးစရာရှိလျှင် မတွေးမဆ ရေးသည်။ ဆဲစရာရှိလျှင် ပျစ်ပျစ်နှစ်နှစ် ဆဲသည်။ ပေါက်ကွဲစရာရှိလျှင် ၀ုန်းဝုန်းဒိုင်းဒိုင်း ပေါက်ကွဲသည်။ ကြီးသူရိုသေ၊ ရွယ်တူလေးစား၊ ငယ်သူသနား စိတ်ဓာတ်များလည်း မရှိကြတော့။ တစ်ခါတစ်ရံတွင် ဖေ့စ်ဘွတ် ဆိုသောအရာသည် အမနာပများဖြင့် ပြည့်လွှမ်း ဖုံးအုပ် နေရော့သလားပင် ထင်မှတ်ရတော့သည်။

ဥပမာအားဖြင့် လူတစ်ဦးတစ်ယောက် မည်မျှ ကောင်းကြောင်း တစ်စုံတစ်ဦးက ပို့စ်တင်လိုက်သည် ဆိုပါစို့။ အဆိုပါ လူကောင်းတစ်ယောက် အဖြစ်ပုံဖော် ရေးသားခံရသူ၏ လုပ်ရပ်၊ ဘ၀ဖြစ်စဉ် ၊ နောက်ကြောင်း များကို သေချာမစုံစမ်း တော့ဘဲ အများနည်းနှစ်လို သည့်အတိုင်း လိုက်ပြီးနှစ်လို လိုက်ကြသည်။ အများချီးကျူး ထောမနာပြုသည့်အတိုင်း လိုက်ပြီးချီးကျူး ထောမနာပြု လိုက်ကြသည်။ အများထောက်ခံ အားပေး သည့်အတိုင်း လိုက်ပြီးထောက်ခံ အားပေးပစ်လိုက် ကြသည်။ အမှန်တွင် လူကောင်းအဖြစ် ပုံဖော်ထားသူမှာ အမှန်တကယ် ကောင်းသူတစ်ယောက် မဟုတ်ဘဲ လက်တွေ့ကျကျ အမှားကျူးလွန်နေသူ ဖြစ်ကြောင်း အချိန်နှောင်းမှ သိခွင့်ရကြ တော့သည်။

ထို့အတူ လူတစ်ဦးတစ်ယောက် မည်မျှဆိုးကြောင်း တစ်စုံတစ်ယောက် က ပို့စ်တစ်ခု တင်လိုက်သည် ဆိုပါစို့။ အဆိုပါ လူဆိုးအဖြစ် ပုံဖော်ရေးသားခံ ရသူ၏ လုပ်ရပ်၊ ဘ၀ဖြစ်စဉ်၊ နောက်ကြောင်းများကို သေချာ မစုံစမ်းတော့ဘဲ အများ ကန့်ကွက်ရှုတ်ချ သည့်အတိုင်း လိုက်ပြီး ကန့်ကွက်ရှုတ် ချကြသည်။ အများဆဲဆိုသည့် အတိုင်း လိုက်ပြီးဆဲဆို ကြသည်။ နောက်ဆုံးမှာတော့ လူဆိုးအဖြစ် ပုံဖော်ခံထားရသူမှာ တကယ့်လူကောင်း တစ်ယောက် ဖြစ်နေကြောင်း အချိန်နှောင်းမှ သိခွင့်ရကြ တော့သည်။

အမှိုက်ကစ ပြာသာဒ်မီးလောင်ပြီ ဆိုလျှင် မီးမွှေးပေးသူများသည် လူမြင်ကွင်းတွင် မရှိတော့။ ကြက်ပျောက်ငှက်ပျောက် ပျောက်ကာ သူတို့ မွှေးပေးထားသောမီး လောင်မြိုက်ခြင်းအတွက် နောက်ကွယ်ကနေ ပီတိဖြစ် အောင်ပွဲခံနေကြ တော့သည်။ တကယ်တမ်း အကုသိုလ်ပွား ဒုက္ခရောက်ရ သူများမှာ ဆင်ခြင်တုံတရား ကင်းမဲ့သူများသာ။

အမှန်မှာ ဖေ့စ်ဘွတ် လောကတွင်သာ မဟုတ်၊ မည်သည့်လောက တွင်မဆို သူများယောင်တိုင်း လိုက်မယောင်မိရန် အထူး အရေးကြီးသည်။ သူများ ကောင်းသည်ဆိုတိုင်း အကောင်းထင် နေခြင်း (သို့မဟုတ်)သူများဆိုးသည် ဆိုတိုင်း အဆိုးထင် နေတတ်ခြင်း (သို့မဟုတ်) သူများဆဲတိုင်း လိုက်ဆဲနေခြင်း မျိုးမှာ ဆင်ခြင်တုံတရားမဲ့ သူတို့၏ ပြယုဂ်တစ်ခုသာ ဖြစ်သည်။

ကျွန်တော်တို့သည် လူသားများဖြစ်ခြင်းကြောင့် အကောင်းရှိမည်၊ အဆိုးရှိမည်။ အမှားရှိမည်၊ အမှန်ရှိမည်။ ချစ်သူရှိမည်၊ မုန်းသူရှိမည်။ သေချာသည့် အချက်မှာ လူတစ်ဦး တစ်ယောက်သည် တစ်ကြိမ် တစ်ခါမှားမိရုံ မျှဖြင့် တစ်သက်လုံး မှားနေမည်ဟု တွက်ဆ၍ မဖြစ်နိုင်သလို တစ်ကြိမ်တစ်ခါ မှန်ခဲ့ရုံမျှဖြင့် တစ်သက်တာ အမှန်များချည်း ထွေးပိုက်နေလိမ့်မည် ဟုလည်း မျက်လုံးစုံမှိတ် ယုံကြည်၍ မရနိုင်ချေ။ ထိုအချက်များ အားလုံးသည် မိမိ၏ ဆင်ခြင်တုံတရားများ အပေါ်တွင် အခြေခံနေမည်သာ ဖြစ်သည်။

ကျွန်တော်တို့ အနေဖြင့် မည်သူ့ကိုမဆို ချစ်ခွင့်ရှိသလို မုန်းခွင့်လည်း ရှိသည်။ ထိုအချက်မှာ လူသားတိုင်းအတွက် မွေးရာပါ အခွင့်အရေး ဖြစ်သည်။ မည်သူ့ကို ချစ်ကြောင်း၊ မည်သူ့ကို မုန်းကြောင်းလည်း ပြောခွင့်၊ ရေးခွင့်ရှိတာ အမှန်ဖြစ်သည်။ သို့သော် မိမိပြောဆိုရေးသား မှုကြောင့် လူတစ်ဦးတစ်ယောက် တစ်ဖွဲ့တစ်စည်း၏ ဂုဏ်သိက္ခာ မထိပါးစေရေး သည်လည်း ကျွန်တော်တို့၏ မွေးရာပါတာဝန် ဖြစ်ကြောင်း သတိချပ်သင့်သည်။

သေချာပြန်တွေးကြည့်မည် ဆိုလျှင် လူတစ်ဦး၏ ရိုင်းစိုင်းယုတ်မာခြင်း၊ လိမ္မာယဉ်ကျေးခြင်း ဆိုင်ရာ အတွေးအကြံ၊ အပြောအဆို၊ အပြုအမူများသည် ထိုလူ၏ ပုံရိပ်နှင့်သိက္ခာသာ ဖြစ်သည်။ မိမိမည်မျှ တတ်သိ နားလည်ကြောင်း၊ မည်မျှ ယဉ်ကျေးကြောင်း ကို မိမိတွေးကြံ၊ ပြောဆို၊ ပြုမူမှုများကသာ သက်သေခံ နေမည်ဖြစ်သည်။

အချို့က မျက်လုံးစုံမှိတ် ပြောတတ်ကြ သေးသည်။ " ငါ့ဖေ့စ်ဘွတ် အကောင့်ကို ငါ့ဘာငါဖွင့်ထားတာ၊ ငါ့ဝေါ ပေါ် ငါရေးချင်တာရေးမယ်။ တင်ချင်တာ တင်မယ်၊ ဘယ်သူ့ကိုမှ ဂရုမစိုက်ဘူး၊ မကျေနပ်ရင် အန်သွားကြ၊ ဘလော့သွားကြ " ဟူ၍။ အမှန်တွင် ထိုသို့ ပြောကြ၊ ရေးကြသူများကို လေ့လာကြည့်သည့် အခါ ပြောချိန်၊ ရေးချိန်တွင် ဒေါသတရား အနည်းနဲ့အများ ကိန်းအောင်းနေကြောင်း တွေ့ရတတ်သည်။ အမှန်တကယ်တွင် အဆိုပါဒေါသ တရားကို အခြေခံကာ ငါ့စကားနွားရ ပြောကြ၊ ရေးကြခြင်းသာ ဖြစ်သည်။

လူဖြစ်လာပြီဆိုလျှင် ဖေ့စ်ဘွတ်မပြောနှင့် ရပ်ကွက်အတွင်း နေထိုင်ရုံမျှနှင့်ပင် တစ်ဦးတစ်ယောက်တည်း နေ၍ ရကောင်းသည် မဟုတ်။ ထိတွေ့ ပေါင်းသင်းရသူများ ရှိတတ်စမြဲဖြစ်သည်။ မိမိက ဆက်ဆံချင်သည် ဖြစ်စေ၊ မဆက်ဆံချင်သည် ဖြစ်စေ ပြောဆိုဆက်ဆံရ သူများ မဖြစ်မနေရှိသည်။ မိမိအိမ်တွင် နေချင်သလိုနေ၊ ဆဲချင်သလိုဆဲမည် ဆိုသော်လည်း မိမိ၏နေထိုင် ပြောဆိုပြုမူမှုများကို မိမိပတ်ဝန်းကျင်မှ လူများ မဖြစ်မနေ တွေ့မြင်ကြားသိ နေကြရမည်သာ ဖြစ်သည်။

ပုံမှန်ရပ်ကွက်လေး တစ်ခုထက် ကျယ်ပြန့်ပြီး အပေါင်းအသင်းမိတ်ဆွေ ပိုမိုများပြားသော၊ ကမ္ဘာအနှံ့သို့ ခြေဆန့်ထားသော ဖေ့စ်ဘွတ်ဆိုသည့် စာမျက်နှာထက်တွင် အကောင့်တစ်ခု စဖွင့်စဉ်အချိန် ကတည်းက သက်ဆိုင်ရာ မိတ်ဆွများဆီသို့ မိမိကိုယ်တိုင် Add ရသလို မိမိကပြန်ပြီး Accept လုပ်ရသည် များလည်းရှိသည်။ ကျွန်တော့်အနေဖြင့် ယနေ့အချိန်ထိ Friend တစ်ဦးမျှ မရှိသော ဖေ့စ်ဘွတ် အကောင့်ကို တစ်ခါမျှ မတွေ့ဘူးခဲ့ချေ။

မိမိ Wall ပေါ်တွင် မိမိကိုယ်တိုင် ရေးချင်ရာရေးပြီး Only me လုပ်ထားသည်ဆိုစေကာမူ အနည်းဆုံး Mark Zuckerberg ကိုတော့ မဖြစ်မနေသိနေရမည်မှာ အမှန်။

သေချာသည်မှာ မိမိ Wall ပေါ် မိမိရေးချင်သလို ရေးမည်ဆိုသော်လည်း တကယ်တမ်းကျတော့ မိမိ ပတ်ဝန်းကျင်တွင် မိမိထက် အသက်ဂုဏ်ဝါ ကြီးမြတ်သူများ၊ ဥာဏ်ပညာ ကြီးမားသူများ၊ လေးစားသင့် လေးစားထိုက်သူများ မဖြစ်မနေ ရှိနေကြမည်မှာ အမှန်ပင်။ မိမိရေးသား ပြောဆိုမှုကြောင့် အဆိုပါ အသက်ဂုဏ်ဝါ ကြီးမြတ်သူများ၊ ဥာဏ်ပညာကြီးမားသူများ၊ လေးစားသင့် လေးစားထိုက်သူများ အပေါ် အဂါရ၀ ဖြစ်စေခဲ့ပြီဆိုလျှင်ဖြင့် နည်းပညာ တစာစာအော်နေသော ခေတ်ကြီးထဲတွင် ကျွန်တော်တို့ လူဖြစ်ရှုံးမှန်း မသိ ရှုံးနေပြီဖြစ်ကြောင်း သတိချပ်သင့်သည်။

ပို၍ဆိုးသည်မှာ ဖေ့စ်ဘွတ်၏ ဘောင်သည် ကျွန်တော်တို့ရပ်ကွက်၊ ကျွန်တော်တို့ မြို့နယ် ၊ ကျွန်တော်တို့ တိုင်းဒေသကြီး၊ ကျွန်တော်တို့ နိုင်ငံအတွင်းမှာတင် ရပ်တန့်သွားသည် မဟုတ်၊ တစ်ခုခု ပြောဆိုရေးသား လိုက်တိုင်း တစ်ကမ္ဘာလုံးသို့ တစ်မုဟုတ်ချင်း ပျံ့နှံ့ သွားခြင်းဖြစ်သည်။ ထို့ကြောင့် ဖေ့စ်ဘွတ်ကို အသုံးပြုပြီး ကျွန်တော်တို့ဘက်မှ တစ်ခုခုမှားယွင်း၊ ရိုင်းစိုင်းခဲ့ပြီဆိုလျှင် ကျွန်တော်တို့၏ မှားယွင်း ရိုင်းစိုင်းမှုကို တစ်ကမ္ဘာလုံးသို့ ချက်ချင်းပျံ့နှံ့ သွားမည်ဖြစ်သည်။

ကျွန်တော်တို့၏ မှားယွင်းရိုင်းပျခြင်း ဆိုးကျိုးကြောင့် ကျွန်တော်တို့ တစ်ဦးတစ်ယောက်တည်း ဂုဏ်သိက္ခာတင် ကျဆင်းသွားရုံနှင့် မပြီးဘဲ ကျွန်တော်တို့ ရပ်ကွက်၊ ကျွန်တော်တို့ မြို့နယ် ၊ ကျွန်တော်တို့ တိုင်းဒေသကြီး၊ ကျွန်တော်တို့ နိုင်ငံ၏ပုံရိပ်ကိုပါ ထိခိုက် သွားတတ်ကြောင်း သတိပြုသင့်သည်။

သေချာ ပြန်တွေးကြည့်မည် ဆိုလျှင် ကျွန်တော်တို့ အနေဖြင့် ယနေ့လို နည်းပညာ ခေတ်ကြီးအလယ်တွင် ဖေ့စ်ဘွတ်လို ဆိုရှယ်မီဒီယာမျိုး သုံးသင့်သည် ဆိုသည့်အချက်မှာ အထူးငြင်းချက် ထုတ်နေစရာ မလိုချေ။ သို့သော် ကျွန်တော်တို့ နှုတ်က နည်းပညာ နည်းပညာ ဟု တစာစာ အော်ဟစ်နေရုံနှင့် မဖြစ်။ သူများကမ္ဘာ့ရွာ ဆိုတိုင်းလိုက်ပြီး ကမ္ဘာ့ရွာ လုပ်နေ၍ မဖြစ်။ မိမိ ကိုယ်တိုင်မှာလည်း ကမ္ဘာ့ရွာနှင့် အံဝင်ခွင်ကျ ဖြစ်စေမည့် အတွေးအခေါ်၊ အသိအမြင် ဆင်ခြင်တုံတရား များရှိအောင် ကြိုးစားရန် အထူးအရေးကြီးသည်။

ဒေးဗစ်၊ ရိုစီ၊ လှမောင်၊ အေးစိန် တို့အနေဖြင့် ဆင်းကတ်တစ်ခု၊ ဟန်းဆက်တစ်လုံးကို ကိုင်ပြီး ကမ္ဘာ့ရွာကြီး အတွင်းသို့ လွယ်ကူစွာ ၀င်ရောက်နိုင်သည်မှာ မှန်၏။ သို့သော် ကမ္ဘာ့ရွာကြီးနှင့် သဟဇာတ ဖြစ်နိုင်သည့် ဆင်ခြင်တုံတရား ပြည့်ဝသော ဒေးဗစ်၊ ရိုစီ၊ လှမောင်၊ အေးစိန်တို့ ဖြစ်လာရန် အတွက်တော့ အလွန်ပင် ခက်ခဲတတ်ကြောင်း သတိချပ်သင့် လှပေသည်။

 မောင်အေးကို (ပေါင်းတလည်)

မြ၀တီနေ့စဉ်